Fingrarnir eru frystir, men mítt føroyska fótbóltshjartað er heitt. Takk til hetta fantastiska KÍ-liði, ið ferð eftir ferð flytur mørkini fyri, hvat vit í Føroyum hildu vera gjørligt at náa. Ein ógloymandi løta á Tórsvølli. og tað eigur Bláa bylgjan og hinir KÍ-fjeppararnir eisini sína stóru tøkk fyri. Tað gjørdi heldur ikki kvøldið verri, at Lille vann dystinum móti Slovan Bratislava.
Enn einaferð hevur KÍ-liðið skrivað føroyska fótbóltssøgu. 23-liðið hjá KÍ vann í kvøld ein sera sannførandi og fult uppibornan 3-0 sigur á Olimpija Ljubljana úr Slovenia. Nú eiga klaksvíkingar at seta nøsina upp ímóti at sleppa víðari úr bólki A í UEFA Conference League-kappingini. Hvør skuldi trúð tí?
Dómarin úr Týsklandi, ið hevur dømt væl í einum sera fair spældum dysti, hevur lagt 4 minuttir afturat.
88. minuttir eru spældir.
Tunnligt á áskðararplássunum. Einans 1121 áskoðarar eru til dystin hjá KÍ, ið kann gerast søguligur, tí hetta kann gerast fyrsti sigurin í einum evropiskum bólkaspæli nakrantíð hjá einum føroyskum liði.
Eitt skulu tey eiga, tey 1121. Tey larma eins og vóru tey 5000.
KÍ-venjarin hevur brúkt sína síðstu innskifting. Á vøllin kom Mads Boe Mikkelsen og út frá Jóannis Kalsø Danielsen, ið hevur spælt enn ein framúrskarandi evropiskan-dyst. Nær sleppur hann at byrja inni aftur á landsliðnum?
Franska stórliðið í UEFA Conference League bólki A, Lille, hevur júst lagt seg á odda 2-1 móti Slovan Bratislava.
10 minuttir resta av vanligu leiktíðini, og hóast Olimpija Ljubljana-leikararnir royna at trýsta, so eru KÍ-leikararnir ikki veruliga trýstir. Teir standa manniliga í KÍ-verjuni.
Hann er áður brúktur nógv í álopinum, tá KÍ hevur spælt Europa Cup-dystir, Luc Kassi. Men í dag spælir hann mitt á miðvøllinum, og besti maður á KÍ-liðnum stýrir bæði miðvøllinum og dystinum. Framúr avrik av manninum frá Fílabeinsstrondini.