– Det var kjekt i 20 km, så vart det brutalt.

Det sa Eivind Øygard til NRK etter han har sprunge maraton i EM.

Jølstringen er nummer 60 på rankinglista, men sikta på å klare topp 40. Han vart ikkje langt unna.

Han kom på ein 42.-plass, 11 minutt og 29 sekund bak vinnaren frå Tyskland, Amanal Petros.

– Eg opna litt for hardt. Eg prøvde på eit maksløp, men det blei litt for tøft, sa han til NRK.

Øygard fortel at han begynte å kjenne krampe ganske tidleg.

– Då var det berre å roe ned og finne sin eigen rytme. Berre komme i mål rett og slett. 

Fredag kveld var det klart for semifinale i NM-cupen i Volleyball. Førde-damene møtte TIF Viking på Åsane Arena. 

Førde-trenar Jan Egil Tvinde seier at det var ein «grusomt spennande» kamp. 

– Det var volleyball på eit godt nivå frå begge laga, seier han til Firda. 

Førde-damene vann 3-1 og tar med seg cupfinalebilletten heim til Førde. 

– Det er veldig kjekt at vi klarte det, spesielt at vi klarte å spele bra på Åsane Arena. Det er ein vanskeleg hall å spele i om ein ikkje er vand med det, seier Tvinde. 

Sist damene var i cupfinalen var i 2023, då var begge Førde-laga med. Dette kan bli reprise av 17. januar. Herrane spelar nemleg cupfinale heime mot Koll søndag klokka 16.00. 

– Vi håpar intenst på at dei også kjem seg til finalen, seier Tvinde. 

Laurdag vart det arrangert det tradisjonsrike motbakkeløpet Stoltzen Opp.

I dameklassen var det førdianar, Karoline Holsen Kyte, som kom først i mål. Ho kom inn på tida 09:53.

Dette er ikkje første gong Holsen Kyte vinn løpet. Det har gjorde ho i både 2021, 2019, 2018 og 2017.

Om 10 dagar startar Vektløfting VM i Førde og tysdag vart det klart når dei norske utøvarane skal løfte. 

For Ragnar Holme har det vore litt usikkert om han skal løfte i A eller B-puljen. No er det bestemt at han skal løfte i sistnemnde. Det går ikkje ut over målet hans. 

– Det er framleis mogleg å komme topp 10, seier han. 

Holme skal løfte fredag 10. oktober klokka 17.00. 

– Det er faktisk betre enn laurdagen. 

Torsdag 9. oktober klokka 17.00 skal Solfrid Koanda løfte, då kjem også Kong Harald. 

Det er få billettar igjen til både torsdag og fredag. 

– Det er veldig kjekt at det er så mange som vil sjå meg løfte, seier Holme. 

Slik løfter dei andre norske utøvarane (lokale i feitt skrift):

• Fredag 3. oktober klokka 15:00
  Sol Anette Waaler & Rebekka Tao Jacobsen
• Laurdag 04.10 kl. 14:30
  Ine Andersson
• Søndag 05.10 kl. 10:00
  Stefan Rønnevik & Rasmus Heggvik Aune
• Måndag 06.10 kl. 12:00 
  Remy Heggvik Aune
• Måndag 06.10 kl. 14:30
  Marit Årdalsbakke
• Tysdag 07.10 kl. 10:00
  Adrian Henneli & Sigurd Haug Korsvoll
• Tysdag 07.10 kl. 14:30
  Julia Jordanger Loen
• Torsdag 09.10 kl. 17:00
  Solfrid Koanda
• Fredag 10.10 kl. 10:00
  Jørgen Kjellevand
• Fredag 10.10 kl. 17:00
  Ragnar Holme

Tidlegare i sommar vart Timian Hafstad frå Førde nordisk meister i go karting. 

16. og 17. august var det norgesmeisterskap, der han også klatra heilt til topps i klassen han køyre i, som heiter x30 Senior.

Dermed har han både nordisk og norsk meister i same sesong. 

I oktober reiser han til Spania for å delta i verdsmeisterskapen, der han skal konkurrere mot dei aller beste i verda. 

Måndag var siste dag i EM i vektløfting. Det var også dagen då naustedølen Ragnar Holme skulle løfte.

Dette var første gong Holme stilte i A-puljen i EM i 109+ kilosklassen.

Holme gjorde det godt i rykk, med 170 kg, 176 kg og 182 kg. 

182 kg er ny norsk og nordisk rekord, skriv Stian Grimseth på Facebook.

I støt løfta Holme først 200 kg. I andre løft prøvde han seg på 210 kg, men det vart ikkje godkjent. Naustedølen valde å stå over det siste forsøket i støt.

– Vi drog det heilt ut i rykk, men eg valde å halde litt igjen i støt. Det handlar om å tenkje langsiktig og ha fullt fokus på VM på heimebane i oktober. No ser eg fram til ein god treningsperiode inn mot VM – eg er veldig motivert, seier Holme til Norges vektløfterforbund.

Dagens prestasjonar gav Holme ein 4. plass i rykk, 10. plass i støt og 7. plass samanlagt. Han er no sikra plass i VM i Førde

Julia Jordanger Loen hadde sin løftedag under EM i Moldova torsdag.

Ho stiller i 71-kilosklassen i B-puljen.

I rykk løfta ho eit 89 kilo, medan dei to andre forsøka vart underkjent.

I støt løfta ho to godkjente løft på 108 kg og 111 kg. Siste forsøket på 114 vart ikkje godkjent.

Til saman løfta ho 200 kg, som sikra ho plass til VM i Førde i oktober.

Ho kom på 13.-plass i rykk, 14.-plass i støt og 13.-plass samanlagt. 

Medan fleire nyt påskeferien konkurrerer fleire lokale vektløftarar i EM i Moldova.

Onsdag løfta Marit Årdalsbakke i B-puljen i 64 kilosklassen.

I rykk vart alle hennar tre løft godkjente på 88 kg, 91 kg og 94 kg. I støt fekk ho godkjent forsøka på 106 kg og 110 kg. Siste forsøk på 112, vart underkjent.

Til saman løfta Årdalsbakke 204 kg. Ho kom på 12. plass i rykk, 17. plass i støt og 16. plass samanlagt.

Dette sikra ho kravet i både 63- og 67-kilosklassen til VM i Førde i oktober. 

Torsdag presenterte Norges Skiskyttarforbund landslaget til kommande sesong.

Stryn-brørne Tarjei Bø og Johannes Thingnes Bø la opp etter årets sesong, men det betyr ikkje at landslaget blir utan lokalt håp i OL-sesongen.

Vinter-OL blir arrangert i Italia frå 6. til 22. februar 2026.

Maren Hjelmeset Kirkeeide frå Stryn er teken ut til landslaget. Ho representerer Markane IL, same klubb som Bø-brørne har gjort.

Johan Olav Smørdal Botn frå Stårheim er teken ut til rekruttlandslaget for herrar.

På rekruttlaget for kvinner var førdianar Karoline Erdal teken ut, men ho takka nei til plassen. 

Denne helga har det vore arrangert NM i terrengløp på kort bane på Bjerke travbane.

 Åsmund Sunde Førde frå Jølster IL stilte til start i U20-klassen. 

Han kom inn på tida 05.49, som sikra han førsteplassen.