Kisitsinermi amigaatini kiserngorussimasoq Avannaata Kommunia piareersimalerpoq. Kommunini tallimaasuni avannarpasinnerpaap kisitsinermi inaarutaasoq saqqummiuppaa. 

Kommunimut qinersineq naammassivoq, qujanarlu malinnaagassi. 

Siumut Avannaata Kommuniani 35,4 procentinik taaguunneqarpoq. Taamaakkaluartoq partii 10 procentpointinik kinguariaateqarpoq. 

Demokraatit partiit siuttuini tulliuvoq 16,1 procentpointinik siuariarluni.

Naleraq partiini pingajuuvoq.

Siumut arfineq-marlunnik, Demokraatit sisamanik, Naleraq pingasunik IA-lu ataatsimik ilaasortaatitaqalerput

Qaanaami Siumut 8,3 procentpointinik siuariarpoq, amerlaqataanillu IA kinguariaateqarluni.

Siumumeersoq Ujuut Olsen 143-nik taaguunneqarnerpaavoq.

Naleqqameersoq Jens NapãtôK' Upernavimmi  taaguunneqarnerpaavoq. 

119-inik taaguunneqarsimalluni.

Malene Vahl Demokraatineersoq Kommune Kujallermi 361-inik taaguunneqarnerpaavoq.

Borgmesteri Stine Egede 80-inik taaguunneqartoq.

Demokraatit Kommune Kujallermi partiini annerpaalerput arfineq marlunnik ilaasortaatitaqalerlutik. Taakkununnga tulliullutik Siumut tallimanik ilaasortaatitaqalertut, IA pingasuinnarnik ilaasortaatitaqalertoq.

Inuit Ataqatigiit nunatsinni kommunini kujasinnerpaami ajorsarujussuarput, partii ukiuni sisamani qinigaarujussuarsimagaluartut.

Inuit Ataqatigiit Qaqortumi 30 procentingajammik kinguariarujussuartoq. Partii pingajuattut inissippoq.

Demokraatit partiini annerpaalerpoq qinersisartut 53 procentiinik taaguunneqarluni 53 procentimillu siuariarujussuarluni.

Siumut aappaattut inissippoq qinersisinnaasut 24 procentiinik taaguunneqarlutik, 25 procentimilli kinguariaateqarlutik.

Rachel Ingemann Demokraatineersoq Qeqqata Kommuniani taaguunneqarnerpaarataannaasoq, Siumulli suli partiini annerusoq taasinerit takutippaat.

Taamaalilluni Malik Berthelsen borgmesteritut ingerlaqqerataannaavoq.

Martha Abelsen Nuummi taaguunneqarnerpaalluni inernerit nuannaarutigigai. 

- Nuannaaqaanga assorujussuaq attortisimaarpunga innuttaasut tusaaneqartutut misigisimanerat nuannaarutigeqaara qinersinerup inernera taamatut isikkoqarpoq.

Borgmesteri Avaaraq Olsen amerlanerussuteqalaarluni ajugaaffigaa. Tassa qinigassanngortittut taakku marluk taasinernik qulinik nikingassuteqarput.

Ane Hansen (IA) Kommune Qeqertalimmi borgmesterinngoqqinniassalluni oqaatiginikuuaa, taamaakkaluartoq taassuma partiia isatserujussuarpoq. Tassami 35 procentimik kinguariangaatsiarpoq naaka ukiuni arlalinni kommunemut qinersisoqartillugu IA taaguunneqarnerpaasaraluartoq.

Kisianni Siumut Kommune Qeqertalimmi anginerpaanngorpoq 39 procentimik taaguunneqarluni 13 procentimillu siuariarluni. Aamma Demokraatit siuariarput - 18 procentimik siuariateqaramik taamaalillutik kommunimi partiini annerit appaattut inissillutik.