1. mai er det betydeleg snøskredfare i Jotunheimen. 

– Stigande temperatur og regn fører til aukande skredfare. Det er moglegheit for at gamle svake lag kan vekkjast til live og auka faren for naturleg utløyste skred, heiter det i varselet frå Varsom.no.

Skredfaren er størst i Vest-Jotunheimen der det er venta mest nedbør.

Klokka 07.55 torsdag morgon melde Vegtrafikksentralen at ein lastebil hadde fått stans i Lærdalstunnelen på E16.

Klokka 09.08 vart tunnelen stengd fordi lastebilen framleis var inne i tunnelen.

Det var publikum som melde frå til Vegtrafikksentralen.

– Vedkomande driv og byter dekk sjølv, men me har teke kontakt med entreprenør for å høyra om dei kan ta seg ein tur for å sjå om det er noko dei kan bidra med, fortalde trafikkoperatør Andreas Rasmussen ved Vegtrafikksentralen Vest til Sogn Avis like før klokka 09.30.

– Er det snakk om punktering?

– Det er eg ikkje heile sikker på, men det kan det nok vera. 

Det var då uvisst kor lenge tunnelen ville vera stengd.

– Lastebilen står ut mot motsett køyrefelt, så det kan oppstå farlege situasjonar ved å halda tunnelen open, sa Rasmussen.

Klokka 11.07 opna tunnelen for fri ferdsel igjen.

Frå torsdag kveld kryp snøgrensa i Sør-Noreg og fredag er det venta 15-30 centimeter snø over 800-1000 meter i fjellområda i den sørlege landsdelen.

Det kan føra til lokalt vanskelege køyreforhold. 

– Snøfokk i fjellet gir redusert sikt og moglegheit for kolonnekøyring eller stengde vegar, heiter det i varselet.

– Bruk riktige dekk og køyr etter forholda, er den klare oppmodinga.

Avgangen frå Fodnes klokka 13.20 vil ha redusert kapasitet på grunn av transport av farleg last, opplyser Noreld driftsvakt. 

Det er berre plass til 12 passasjerar.

Klima- og miljøminister Andreas Bjelland Eriksen inviterer alle lokale innbyggarar, organisasjonar og andre interesserte til folkemøte om tiltaksplan for villrein i Nordfjella villreinområde.

– No som det blir laga ein plan for å få tilbake villreinen i Nordfjella sone 1, er det viktig at me følgjer opp med ein tiltaksplan for å gje reinen eit godt livsgrunnlag når den kjem tilbake. Skal me klara det, må mange gode krefter dra i samme retning. Då er det heilt avgjørende at tiltaksplanane har god forankring lokalt. 

– For å sikra breitt engasjement i det vidare arbeidet med planane oppfordrar eg alle som har synspunkt på villreinen si framtid i Nordfjella til å delta på folkemøtet i Flåm, seier Bjelland Eriksen i ei pressemelding.

Folkemøtet finn stad på Fretheim hotell fredag 9. mai.

Fjøra tok ein viktig siger heime mot Vålerenga 2 laurdag.

Det er andre siger på rad for raudtrøyene, som hadde starta sesongen med to tap.

Dermed vart dette ei god veke for Fjøra med full pott i to heimekampar, først mot Loddefjord der dei halte i land ein 3-2 siger, og mot Vålerenga 2, der sluttresultatet vart 3-1.

Laurdag var det Noah Heggestad som opna ballet for heimelaget, allereie etter ni minutt.

Deretter la Mathias Hovland på til 2-0, og det vart også pauseresultatet.

Etter kvilen auka Brage Asperanden Navarsete til 3-0, og det såg veldig lyst ut før heimelaget.

Vålerenga 2 reduserte, men Fjøra kontrollerte inn til ein ny trepoengar. 

Etter sigeren måndag denne veka uttalte Fjøra-trenar Knut Almås at laget fekk betalt for jobben dei gjorde i påsken. Då tok dei berre nokre dagar fri og trente på påskeaftan.

Den effekten ser ut til å vara ved. Fjøra har kara seg opp til midten av tabellen før ein ny bortetur ventar om ei veke. Då er Bjarg motstandar. Bergenslaget har starta sesongen sterkt, og vann også mot Fjøra i cupoppgjeret tidlegare i vår.

Sogndal Fotball og Sander Aske Granheim er samde om ein avtale som strekkjer seg ut 2027. 

Sander Granheim kjem frå Sandane og har gått gradene i Sandane Turn og Idrettslag før han meldte overgang til Sogndal. Han har fulgt stigen gjennom utviklingsavdelinga, og signerte denne veka sin fyrste proffkontrakt i ein alder av 17 år, skriv Sogndal Fotball på sine nettsider fredag.

- Det føles veldig bra å signere kontrakt. Det gir meg meir motivasjon til å fortsette å utvikle meg, seier Granheim.

Granheim har tidlegare hospitert med Sogndal NG 17 i kampar i nasjonale serie. Samstundes spelte han for Sandane i den lokale serien. I august 2023 vart han offisielt sogndalsspelar. 

Både toppspelarutviklar Patrik Karoliussen og sogndaltrenar Luis Pimenta gir i pressemeldinga uttrykk for at dei er imponerte over den unge midtstopparen. 

Ansvarleg for spelarlogistikken, Håvard Flo, skryt av alle som har tatt del i utviklinga til Sander:

- Det at Sander no blir profesjonalisert er utruleg kjekt for alle som har vore involvert i utviklinga hans. Dei 2,5 åra Sander har vore i klubben har han fått god rettleiing gjennom sine lag (NG17, NG19, Sogndal 2 og no A-laget). Det er eit prov på at unge fotballspelarar blir forma godt gjennom utviklingsarbeidet i vår klubb. Eg vil også rose Sandane for den fine utviklinga han har hatt i sin moderklubb, og måten dei har lagt til rette for at han har fått denne moglegheita i Sogndal, seier Flo.

Like før klokka 09.30 fredag melder Vest politidistrikt om at ein MC har begynt å brenna under køyring. Brannen har vidare spreidd seg til vegetasjon. 

Det skal vera rundt 10 kvadratmeter som brenn. Føraren er uskadd og politiet er på staden, går det fram av politiloggen. 

110 Vest opplyser at brannen er ved Guddalsvegen, ved Heldalsvatnet. Brannmannskap frå Lavik og Sande er på veg. Det same er tankbil frå Høyanger. Vegen er stengd på staden, opplyser politiet. 

Klokka 10.08 melder 110 Vest at det er kontroll på brannen. 

Statens vegvesen heldt trafikkontroll i Aurland torsdag og seinare på kvelden stod dei på Håbakken i Lærdal. 

Det vart avdekt mindre tekniske manglar, men eitt føretak vart politimeldt fordi det mangla fartsskrivar i trekkbilen som vart nytta til godstransport, viser kontrollrapporten. 

I tillegg vart det mellom anna vart det skrive ut to bruksforbod og to køyretøy fekk skriftlege manglar. 

Frå og med natt til fredag 25.april klokka 03:00 frå Mannheller ferjekai, blir det ordinær drift i sambandet, opplyser Norled.

Arbeidet i Fodnes-tunnelen tek pause frem til måndag kveld 28.april.

Dette betyr at ferjene vil gå mellom Mannheller og Fodnes også nattestid.