E16 Gudvangatunnelen i Aurland er stengd melder vegtrafikksentralen klokka 14.38 fredag. 

Grunnen er svært ureina luft. 

Litt over klokka 15 var tunnelen open for fri ferdsel att.

UP heldt laserkontroll i 80-sona ved Bjørkum i Lærdal fredag. 

Totalt vart det skrive ut 14 forenkla førelegg. Høgste fart var 114 kilometer i timen, går det fram i ei melding frå Vest politidistrikt. 

Noregs Bank trassa forventningane og set ned styringsrenta til 4,25 prosent. Det er første gong renta blir endra sidan desember 2023.

Både NHO, SSB og ei rekke økonomar og analytikarar hos bankane venta at Noregs Bank kom til å halde styringsrenta uendra på 4,5 prosent når dei kunngjorde avgjerda si torsdag klokka 10.

Dei var samstemde i forventninga om at eit rentekutt ikkje kom til å komme før i september, i tillegg til eit mogleg kutt i desember.

Frå og med 20. august legg NRK ned tekst-TV. Dei skuldar på tekniske feil og mykje vedlikehald.

Kanalen skriv at all informasjon som i dag er tilgjengeleg på tekst-TV, også er tilgjengeleg på nettsidene deira.

Tekst-TV kom i 1983, og no, 42 år seinare, er det altså slutt.

Onsdag ettermiddag meldte Vegvesenet om brann i eit køyretøy i Kjøsnestunnelen på riksveg 5.

Til Firda opplyser vaktkommandør Trond Landaas i 110 Vest at dei rykkjer ut med mannskap.

Det skal ha vore brann i ein lastebil, men denne har kome seg ut av tunnelen.

Også Fjærlandstunnelen vart stengd ein periode. Det var heller ingen brann - det viste seg å vera ein kjølevæskelekkasje som skapte vassdamp.

Torsdag vert det stor øving på fylkesveg 55 mellom Gaupne og Nes mellom klokka 09.00 og 15.00.

Sjølve øvinga skjer på rasteplassen i Øksnaviki, så vegen vil ikkje bli stengd.

– Den første alarmen om trafikkulukke går klokka 09.00, så skal me ha same øvinga to gonger slik at flest mogleg får trening, seier Anja Blaker, lege i Luster.

Så høyrer du sirener i området på torsdag, så er det mest truleg øving som føregår.

På styremøtet 13. juni var stiftinga Litteraturbåten Epos tvungen
til å vedta å leggje båten ut for sal og å gje dagleg leiar oppseiing om ikkje situasjonen endrar seg innan 30. juni.

Det melder stiftinga i ei pressemelding.

Litteraturbåten har søkt stat og fylke om 3,5 millionar i driftsstøtte for 2026 og vidare, men treng i underkant av ein halv million for å halda det gåande fram til nyttår. Det har stiftinga no to veker på seg å skaffa.

150 arrangement

På tre år har Litteraturbåten Epos besøkt 44 kommunar på Vestlandet, hatt over 150 arrangement, og hatt 5000 besøkjande. Det har vore hendingar og program i samarbeid med over 20 andre kulturinstitusjonar, festivalar, organisasjonar og frilansaktørar.

– Dette er enormt trist. Me ser så tydeleg at tilbodet er ynskt, sett pris på og eit viktig tilskot i distrikta, men det er ikkje mogleg å drive ein kulturinstitusjon utan driftsstøtte, seier dagleg leiar Maria Pile Svåsand i pressemeldinga. 

Fylkeskommunalt i 60 år

I 60 år var båten eit fylkeskommunalt tilbod som bibliotek og arrangør. Då dette vart lagt ned, skapte det eit engasjement som resulterte i den nye stiftinga, som vart etablert i 2022. Den har som føremål å vidareføra tradisjonen med flytande kulturinstitusjon til bygdene på Vestlandet. 

Rv5 Fodnestunnelen mellom Fodnes og Lærdal var kortvarig stengd onsdag morgon. Det melder vegtrafikksentralen klokka 08.50. Grunnen er syklande i tunnelen. Klokka 09.03 melder vegtrafikksentralen at tunnelen er open att. 

Fylkestinget gjekk tysdag ettermiddag samrøystes inn for å setja i gang med arbeidet med symjehallen i Sogndal.

I avtalen med Sogndal kommune ligg det at Vestland fylkeskommune finansierer rehabiliteringa av eksisterande anlegg, medan Sogndal kommune skal stå for bygging av nytt opplæringsanlegg.

Arbeidet startar opp på nyåret, og ein reknar med å vera klar til skulestart  2027.

Samla prislapp: 151,7 millionar kroner.

Vegfarande har tipsa Sogn Avis om ein lastebil som ligg delvis velta på sida på fv. 55 ved Kvamsøy i Balestrand.

Vegtrafikksentralen hadde ikkje fått melding om dette i 16-tida tysdag og det er ikkje opplyst om trafikale problem. Politiet har førebels ikkje meldt om trafikkuhell på staden.

I 17-tida oppdaterer Vegtrafikksentralen med at det vil føregå bilberging på staden. Vegen er stengd medan berginga pågår. Berekna slutt på oppdrag er klokka 19 tysdag.