På E16 like aust for Fretheimstunnelen i Flåm har ein tilhengjar velta og skaper trafikale problem på staden. 

– Politiet er på staden. Eitt felt er ope. Trafikken blir dirigert forbi, vert det opplyst frå Vegtrafikksentralen klokka 10. 30 søndag. 

Uhellet skal ha ført til noko skade på autovernet. Dette skal entreprenør sjå på. 

Ved 11.30-tida var det fri ferdsel på staden. 

Operasjonsleiar Dan- Erik i Vest politidistrikt seier det vart frakta ein bil på hengaren. 

- Politiet opprettar sak på forholdet, men det er ikkje gjort førarkortbeslag. 

Området rundt dei brannråka bygningane blir sperra av, det er svært viktig at publikum respekterer sperringane. 

Det melder Lærdal kommune laurdag ettermiddag. 

Kommunen skriv på nettsida at området rundt dei brannråka bygningane blir sperra av med sperreband og det er viktig at publikum respekterer sperringane. Dette av tryggleiksomsyn, skriv kommunen. 

Vidare blir det kontinuerleg brannvakt i området utover kvelden laurdag og natt til søndag - så lenge dette er naudsynt. 

Alle bebuarar som vart evakuerte laurdag morgon - både fastbuande og overnattingsgjester i kringliggjande bygg som ikkje var direkte råka av brannen - får laurdag ettermiddag flytta attende, melder kommunen. 

Statsminister Jonas Gahr Støre vil takka alle som har stått på for å sløkkja brannen i Lærdal. 

– Brannen i Lærdal gjer sterkt inntrykk og eg tenkjer på alle som på ulike måtar er berørte. Lærdalssamfunnet har erfart storbrannar før og brannen som pågår no gjer difor ekstra sterkt inntrykk, seier Støre i ei pressemelding. 

Han rosar brannmannskap og naudetatar. 

– Eg ynskjer å gje honnør til alle som no gjer ein innsats i Lærdal. Eg vil takka brannmannskap og naudetatar som har stått på sidan i dag tidleg med det krevjande sløkkjearbeidet. 

Under ein kontroll ved Sogndal trafikkstasjon og på Hafslo torsdag, vart 843 kontrollerte for manglande bruk av bilbelte. 

I kontrollrapporten til Statens vegvesen går det fram at det vart skrive ut to bilbeltegebyr. 

Det vart skrive ut to bruksforbod og ni køyretøy fekk skriftlege manglar. 

– Dei fleste hadde alt i orden, berre mindre manglar på nokre av køyretøya, heiter det i oppsummeringa frå dagen. 

Fylkesutvalet har vedteke ni tiltak som skal betre levekåra for skeiv ungdom i Vestland, i tillegg ei oppmoding til skulane om regnbogeflagget.

Det melder fylkeskommunen i ei pressemelding. 

Dette er eit resultat av rapporten Korleis har skeiv ungdom det i Vestland? Her kjem det fram at skeiv ungdom i Vestland har dårlegare levekår enn ikkje-skeiv ungdom. 

Bidra til inkludering

– Slik skal det ikkje vera i fylket vårt eller nokon annan stad. Difor må me gjera det me kan, med dei verkemiddel me har, for å bidra til eit inkluderande og rettferdig samfunn, med like moglegheiter for alle, seier fylkesordførar Jon Askeland i pressemeldinga. 

I tillegg til ei rekke konkrete tiltak, kom fylkesutvalet i møtet 4. juni med ei oppmoding til alle dei vidaregåande skulane i fylket om å flagge med regnbogeflagget. 

– Happy pride

– Flagget er eit viktig symbol på mangfald, inkludering og tilhøyrsel. Difor oppfordrar me skulane til å nytta flagget i løpet av pridemånaden og ved lokale pridearrangement i nærområda til skulane. På vegner av fylkeskommunen ønskjer eg alle happy Pride, seier Askeland i pressemeldinga.

Oppmodinga vart vedteken med 16 mot 1 stemme. 

Fylkesutvalet vedtok elles ti punkt for å følgja opp levekåra for skeiv ungdom

Stortingsfleirtalet har vedteke ei erstatningsordning for overlevande og etterlatne etter Alexander Kielland-ulykka, mot regjeringas og Høgres vilje.

Ein brei koalisjon av nesten alle opposisjonspartia på Stortinget stilte seg bak forslaget om erstatningsordninga.

Berre Arbeidarpartiet og Høgre stemde imot.

53 av representantane som var i salen stemde for, medan 51 stemde mot.

I vedtaket ber Stortinget regjeringa etablere ein «særskilt kompensasjonsordning for dei overlevande og etterlatne etter Alexander L. Kielland-ulykka».

Vidare ber fleirtalet om at Riksrevisjonen må avklare ansvaret til styresmaktene for at ulykka kunne skje, og den manglande oppfølginga til styresmaktene av overlevande og etterlatne.

– Riksrevisjonens nye undersøking skal gjennomførast og leggjast fram innan utgangen av 2025, slår stortingsfleirtalet fast.

123 av 212 menneske om bord omkom då bustadplattforma Alexander L. Kielland kantra i høg sjø 27. mars 1980. Det er den største industriulykka i norsk historie.

Det har vore gjennomført ei rekke granskingar og utgreiingar, og Stortinget har fleire gonger stemd over ulike spørsmål knytt til ulykka. Seinast i 2021 meinte Stortinget at det ikkje var nødvendig med ei ny gransking, sjølv om det framleis ikkje er etablert kven som hadde ansvaret for ulykka.

Tidlegare i år avdekte ein rapport frå Universitetet i Stavanger at måten styresmaktene har handtert ulykka på, hadde alvorlege manglar. Overlevande og etterlatne har heller ikkje fått noka erstatning frå staten – sjølv om dei fekk erstatning frå forsikringsselskapa til Phillips Petroleum og Stavanger Drilling på 1980-talet.

Det var sjansefattig og mållaust fram til det 73. minutt i søndagens oppgjer mellom Fjøra og Sandefjord 2.

Så gjekk det fullstendig gale for heimelaget.

Først tok gjestene leiinga etter eit godt skot frå 16 meter, og berre halvminuttet seinare blei fjørene redusert til ti mann etter at Ola Lerheim Olsen fekk sitt andre gule kort for dagen.

Oppoverbakken blei brått stupbratt, og gjekk over til ein 90-graders vertikal då gjestene dobla til 0–2 fem minutt før slutt.

Ulrik Flo skapte eit lite håp med sin redusering djupt inne i overtida, men meir skjedde ikkje, og dermed enda det med tap 1–2.

Søndag 1. juni opna gamlevegen over fjellet mellom Aurland og Lærdal etter vinterstenging.

Måndag 2. juni er det varsla vegarbeid på strekninga frå klokka 07.00 til 19.00. Det vert manuell dirigering forbi arbeidet.

Vassbygdtunnelen i Aurland er under oppgradering.

Førstkomande helg vil det vera arbeid i tunnelen som fører til mykje stenging.

Arbeidet startar klokka 18.00 og vart avslutta klokka 06.00.

Det blir kolonner kl. 19.00, 20.00, 21.45, 23.00, 00.00, 01.00, 02.00 og 03.00. 

Dette gjeld både natt til laurdag og natt til søndag.

Kommunestyret i Sogndal vedtok onsdag å kjøpa Ohnstadhaugen 13, eigedomen som ligg rett på nedsida av sjukeheimen på Leikanger.

Det var eigar av huset som sjølv tok kontakt med kommunen med tanke på eit mogleg sal. Etter ei vurdering av tilstanden gav kommunen eit bod på 3,9 millionar, som vart akseptert.

Nærleiken til sjukeheimen gjorde at administrasjonen vurderte tomta som strategisk viktig for å legga til rette for utviding og samlokalisering av framtidige helse- og omsorgstenester i området.

Seljaren hadde stilt som vilkår at oppgjeret vart utbetalt innan 29. mai, difor vart saka sett opp først på sakskartet i kommunestyremøtet onsdag.

Ingen av dei folkevalde hadde innvendingar mot kjøpet, som dermed vart vedteke samrøystes og utan debatt.