Fv 5606 i Balestrand mellom Menes og Sværefjorden opna laurdag morgon. 

Fv 5624 Brekkevegen mellom E16 og A-feltet i Flåm opna laurdag om lag klokka 13. 

E16 opna heile vegen til Bergen klokka 1245, men med redusert framkomst. E16 Svartenakken – Bulken er open med manuell dirigering, medan det framleis er stengt i Voss sentrum.

Fv 5625 Skjerdalsvegen er opna kring klokka 1315 etter eit mindre ras.

Flåmsbana og Bergensbanen opna begge litt før klokka 16 laurdag.

Laurdag morgon er status følgjande på vegane og jernbana i Sogn:

• Flåmsbana er stengt inntil vidare på grunn av store vassmengder ved Blomheller. Det er uvisst kor tid bana opnar att, melder Bane Nor. Dessutan er Bergensbanen stengt mellom Dale og Voss, her er det ny vurdering klokka 10 laurdag.

• Fv 5625 Skjerdalsvegen stengt ved Voldedalen grunna fare for steinsprang. Ny vurdering klokka 12 laurdag er oppført på Vegvesenet sine nettsider, og trafikkoperatør Kjetil Larsen opplyser at faren for skred blir vurdert laurdag føremiddag og vegen opna då om tilhøva blir vurdert som trygge.
• Fv 5624 Brekkevegen mellom E16 og A-feltet i Flåm stengt på grunna av mykje vatn. Uvisst når den opnar att men det er tilkomst via vegen på andre sida av jernbana.
• Fv 5606 mellom Menes og Sværefjorden var stengt ved Brokaskreda etter skredet torsdag kveld, men vart opna laurdag morgon.
• E16 er open til Voss austfrå, men stengt fleire stader vestover, allereie på strekninga mot Bulken. 

- Dette på grunn av mykje vatn i vegen, så det er ikkje mogleg å koma seg mot Bergen frå Voss på E16 no. Då må ein køyra om på sørsida, via Granvin, seier trafikkoperatør Larsen.

- Når meiner de å kunne opna E16 att?

- No er vatnet på veg ned, så me håpar å kunne rydda opp og ordna til så me får opna i alle fall eitt køyrefelt i løpet av nokre timar.

Natt til laurdag tvitra Vest politidistrikt litt for klokka 2 at to husstandar med til saman sju personar er isolerte i Fjærland.  Dette på grunn av mykje vatn frå Flatbreen som som gjer at Supphellevegen ikkje er framkomeleg.

Etter at Sogn Avis snakka med bebuarane viste det seg at det er fem personar som er isolert.

- Bebuarane har stengt vegen på eige initiativ fordi det kjem så mykje vatn. Me skal ringja attende til dei no og eventuelt kopla på Statens Vegvesen og kommunen. Det er også kome noko småstein, og dei frykta større skred, utan at det har skjedd, seier operasjonsleiar Jørgen Ommedal i Vest politidistrikt laurdag morgon klokka 8. 

Seint fredag kveld stengde også Ålmennhagen bru på Utladalsvegen slik at alle som bur i Utladalen var utan vegsamband gjennom natta. Årdal kommune melde klokka 6 laurdag morgon at brua var open att.  

Fredag kveld er E16 stengt fleire stader, hovudsakleg på grunn av vatn som går over vegbana. Vegen er stengt både mellom Vinje og Voss, og mellom Voss og Bergen. Få oversikt på vegvesen.no - også nokre fylkesvegar i Sogn er stengt.

Vidare stengde strekninga Dale-Voss på Bergensbanen for togtrafikk på grunn av flaum om lag klokka 21 fredag.

Stabssjef innbyggjarservice i Voss herad, Tor Helmer Halvorsen, har sendt ut følgjande pressemelding om stoda i kommunen:

Flaumen på Voss får store konsekvensar. I verste fall kan me gå over nivået på flaumen i 2014.

Me ber folk om å halda seg unna flaumutsette område, det er farleg å opphalda seg nær elv og vatn.

Det er framleis usikkert når flaumen når toppen. Me ser at Raundalselva har nådd toppen, medan Strandaelva har svært høg vassføring, samanlikna med 2014.

Vervarslinga sin målestasjon i Myrkdalen har registrert 140 millimeter nedbør siste døgn.

Grunna flaumen er det ei rekkje tiltak som er, eller vil verta, sett i verk utover kvelden og natta:

• Langabrua er stengt
• Evanger bru (E16 til Evanger sentrum) er stengt
• Lokalveg Petter Bondes veg (forbi Voss vandrarheim) er stengt
• Straumen er kobla ut i Fredheim burettslag og i Voss vandrarheim

Ei rekkje andre små og store tiltak vert fortløpande sett i verk i forsøk på å avgrensa skadene av flaumen.

Me oppmoder folk om å sikra eigne verdiar som er utsett for flaum. Og at alle held seg oppdatert på situasjonen på varsom.no

Det er raudt farevarsel på fleire av fjellovergangane  i Sogn fredag ettermiddag, mellom andre Filefjell og Sognefjellet. Årsaka er dei store nedbørsmengdene

Vegtrafikksentralen Vest melde også om ein del stein på fv 53 i svingane opp frå Øvre Årdal mot Sletterust fredag rundt klokka 1630. Det er passasje. Entreprenør var då på veg.

Flåm-vassdraget nådde litt over klokka tre 50-årsflaum. 

Grafen peikar framleis rett opp klokka 16.40. 

Bøyumselvi i Fjærland, Sogndalselvi og utløpet av Årdalsvatnet har alle passert grensa for 5-årsflaum. 

Utla og Offerdalselva i Årdal ligg begge rett under fredag ettermiddag. Utla hadde 5-årsflaum i dag tidleg. 

- Vasstanden stig no raskt i mange vassdrag på Vestlandet. Det har regna mykje siste døgn, og det er venta framleis mykje regn i midtre og indre strøk av Vestland fylke fram til i natt. NVE oppgrader difor til raudt farevarsel for flaum for dei områda som er venta å få mest nedbør, skriv NVE om varselet, som ligg på varsom.no.

Midtre og indre deler av Vestland fylke ligg i den raude sona, det innbefattar heile Sogn. 

- Raudt farenivå er ein ekstrem situasjon som førekjem svært sjeldan, som krev tett oppfølging og kan føra til store skader. Situasjonen kan føra til omfattande oversvømmingar, erosjonsskader og flaumskader på infrastruktur og bygg. NVE har sett beredskap og vil følgja situasjonen tett, står det vidare.

Varselet gjeld fram til laurdag morgon.

- Følg situasjonen tett, hald deg unna vassdrag og ver særskild varsam viss du ferdast ute, seier vakthavande hydrolog i NVE, Elise Trondsen.

NVE har også ute eit farevarsel for jordskred og flaumskred på oransje nivå for indre delar av Vestland fylke fredag. 

Litt over klokka 1430 fredag vart E16 stengt ved Hole, sørvest for Vinje, altså i retning Voss. 

– Kor lenge vegen er stengd er vanskeleg å seia, men det er varsla mykje nedbør som kan føra til at vegen ikkje blir opna før laurdag, informerer Vakthavande hjå Vegtrafikksentralen, Kjetil Larsen til Avisa Hordaland.

E16 vart ikkje lenge etter også stengt ved Saue camping aust for Skulestadmo .   

Vidare er det også såpass mykje vatn i elva Hallinggrovi på aurlandssida, i Nærøydalen, at E16 kan bli stengt på kort varsel der også, melder Statens Vegvesen.

Oppdatering klokka 17: Vegen er no open for tyngre køyretøy på punkta med mykje vatn, men det er manuell dirigering. For lettare køyretøy er framleis vegen stengt.

Oppdatering klokka 1810: Strekninga Hyvingtunnelen og Hernestunnelen på E16 mellom Bergen og Voss er stengt grunna flom ved Bolstadtunnelen.

Dette er status for nokre utvalde NVE-målestasjonar i 14-tida fredag: 

• I Bøyumselvi nådde vassføringa nivået for 50-årsflaum klokka 05.00 i natt. Elva har minka mykje sidan då, og er no under det såkalla middelflaum-nivået.
• Krokenelvi i Luster bikka òg så vidt det same nivået i 07-tida. Her òg kan det tyda på at vatnet er i retur.
• Sogndalselvi nådde ein førebels topp i 10-tida på føremiddagen fredag. Då var vassføringa godt over grensa for ein 5-årsflaum.
• I Årdal nådde målestasjonen i Utla ein førebels topp ved ein 5-årsflaum mellom klokka 8 og 9 om morgonen. Det er framleis venta mykje nedbør i området.
• I Lærdalselvi er vatnet kraftig stigande ved Stuvane. Grafen frå målestasjonen peikar rett opp, men historiske tal er ikkje tilgjengelege. 
• Ved Flåm bru er Flåmselvi oppe og snusar på ein 50-årsflaum ved siste måling i 13-tida.
• Nærdøydalselvi såg ut til å nå toppen i 02-tida i natt, og stoppa då på ein 5-årsflaum. Sidan har vatnet minka til under nivåa for ein middelflaum.

Kjelde: NVE si nettside: https://sildre.nve.no/

Store delar av Fjordstien er under vatn fredag ettermidddag. Når Sogn Avis er i området klokka 13.45, er vatnet på veg ned att.